يا دار.. كلمات الشاعرة: نهلة عنان بدور

يا دار ..



عَينِكْ ....على حُبِّي

يا دار ..

على دَربِكْ.. شو كان

في زوَّار ..

بالحُبّ والهَنَا عايشين

نسهَر مع القمر ونقول

مَرحَبا يا جار ..



يا دار ..

شو عَدِّتْ علينا سنين

محَمَّلِة أماني وعطر

الياسمين ..

ذكرى الليالي السعيدة

وأشواق وحنين ..

شو عَنِّتْ عَ بالي ليالينا

سَوا ..

نرفرِف بالعلالي يطَيِّرنا

الهَوَا ..

الزمن لعب فينا وبعدوا

الأحباب ..

وسَكتِتْ حَناجرنا وضاعِتْ

أغانينا ..

والقمر من عِنَّا غاب لا حُبّ

يروينا ..

والرِّضا رايح و ناسينا

صارِتْ ليالينا وَهم وسَراب



يا دار العز ..

انطَفوا القناديل ..

سَكَّروا الأبواب ....وخرسوا

المَواويل ..

الأصوات عّم تبعُد وضاعوا

المراسيل ..

بالقلب ...في تنهيدة وأنا

وَحدي وَحيدة ..

سَابِق ذِكرَياتي .....وخَبِّر

حكاياتي ..

لَـعصافير الشوق بَلكي

بشوف دَليل ..



بالأيَّام اللي راحوا قَتلوا

واستَباحوا ..

أحلامنا الوَليدة وبقينا

بالجريدة شهيدة وشهيد

أزهارنا عَم تدبَل وأسعارنا

زَهيدة ..



شو بخَبّرِك عن حالنا

يا دار ..

دار علينا الزمن وأَخَدنا

بدوَّار ..

بالقلب في حَسْرَة والشوك

عَامِل زنَّار ..

والفَرَح محتار مَعْنَا يهاجِر

وَلاَّ يبقى ما عِندو خَيار



يا دار المَحَبِّة ..

ما عاد في زوَّار نارِكْ

رَمَّدِتْ ..

وأحبابِك تَرَكُوا الديار

ضَيَّعتنا الليالي وضَيَّعنَا

عنوان الدَّار ..