أحمد زيادة يكتب: متبقاش معقّد وتنتقم من ماضيك في شغلك وبيتك

هسألك سؤال:
ليه أول ما الدور بييجي علينا، بنعمل في اللي بعدنا نفس الحاجة اللي كانت بتوجعنا؟

أبوك كان شديد معاك؟
تكبر وتقول:
أنا اتربيت كده وطلعت راجل..!!

مديرك كان بيضغطك ويعاملك بطريقة وحشة؟
تبقى مدير وتقول لفريقك:
أنا استحملت أكتر من كده وطلعت شاطر..!!

كأن كل واحد فينا مستني دوره علشان يكرر نفس اللي حصل معاه، بدل ما يكون هو الشخص اللي يوقفه.

نجحت بسببها.. ولا رغمها؟

المشكلة إننا ساعات بنفتكر إن الحاجة اللي عدينا منها، هي نفسها الحاجة اللي خلتنا ننجح، مع إن الحقيقة ممكن تكون مختلفة تمامًا.

ممكن تكون نجحت عافية وعِند، مش بسبب اللي حصلك.
وممكن تكون وصلت لأنك كنت بتحاول تهرب من التجربة، مش لأنها كانت تجربة مفيدة.

يعني كونك استحملت القسوة، مش معناه إن القسوة كانت صح. وكونك عرفت تشتغل تحت ضغط طول الوقت، مش معناه إن الضغط هو اللي عمل منك موظف شاطر.
وارد تكون نجحت رغم اللي حصلك، مش بسببه.

الغريب إنك ممكن تفضل سنين تشتكي من والدك أو مديرك، وأول ما يبقى عندك أولاد أو فريق، تكرر معاهم نفس الأسلوب.

ليه؟ علشان تقنع نفسك إن اللي حصلك كان طبيعي؟

لأنك لو اعترفت إن الطريقة كانت غلط، هتضطر تعترف إنك اتوجعت من غير سبب. فبدل ما تواجه ده، بتعيد نفس التجربة مع غيرك وتقول:
"ما كلنا اتربينا كده".
"الشغل مفيهوش دلع".
"هو أنا لما كنت مكانه حد كان بيراعيني؟"

وهنا الوجع بيتحوّل من تجربة عدّت عليك، لحاجة بتورّثها للي بعدك.

مش كل قسوة اسمها تربية، ومش كل ضغط اسمه إدارة.
فيه فرق بين إنك تبقى حازم، وإنك تهين اللي قدامك. وفيه فرق بين إنك تطلب من موظفك نتيجة قوية، وإنك تستنزفه نفسيًا كل يوم.

القائد الشاطر مش اللي فريقه بيخاف منه. القائد الشاطر هو اللي يعرف يطلع أحسن ما عند الناس، من غير ما يكسرهم.

والأب القوي مش اللي ابنه يخاف يتكلم قدامه. الأب القوي هو اللي ابنه يحترمه ويثق فيه، وفي نفس الوقت يعرف إن فيه قواعد وحدود.

تقدر تعلم من غير ما تقلل.
وتقدر تحاسب من غير ما تجرح.
وتقدر تطلب أكتر من غير ما تهلك الناس.

أبوك غلط؟ متكررهاش مع ابنك.
مديرك ظلمك؟ متظلمش فريقك.
حد قلّل منك علشان يعلمك؟ متقللش من غيرك لما يبقى الدور عليك.

وبصراحة: متبقاش معقّد وتنتقم من الماضي في ناس موجودة دلوقتي وملهاش أي ذنب فيه.
مش لازم كل واحد بعدك يدفع نفس الفاتورة اللي إنت دفعتها.

القوة مش إنك تستحمل الوجع، وبعد كده توزعه على غيرك.
القوة الحقيقية إنك تكون آخر واحد الوجع وقف عنده.

العيلة اللي جيت منها كانت قدرك، والإدارة اللي اشتغلت تحتها كانت تجربتك.
لكن عيلتك وفريقك دلوقتي مسؤوليتك.