نصائح نهي

رمضان لم ينتهي بعد ومازالت العزومات قائمة وكلنا لا نستغني عن القطايف، لذا سنعرف الوصفة من نهى الشريف سواء كانت حادق أو حلو.

هنبتدي نجهز حاجات تساعدنا لأننا في رمضان مش بنلحق نعمل كل حاجة ونقف في المطبخ وقت طويل مع الصيام كل يوم.. من الحاجات اللي بتميز سفرة رمضان هي القطايف اللي اعتقد كل سفرة لازم يبقي عليها قطايف طول الشهر سواء حادق (بالجبنة او باللحمة) أو حلوة ( بالمكسرات والقرفة) ودي ممكن نحضرها من قبل الشهر الكريم ونقسمها كل ١٠ في كيس بلاستيك في الفريزر وتبقي جاهزة علي التحمير وكمان اقدر أعمل الشربات للقطايف الحلوة واشيله في برطمان كبير ويبقي جاهز معايا وأسهل علي نفسي شوية.
حشوة القطايف الحادقة:
جبنة بيضا (اسطنبولي او فيتا) عليها نعناع ناشف بودرة و سماق او لحمة مفرومة و معصجة و بقدونس.
حشوة القطايف الحلوة:
اشوح اي مكسرات عندي علي النار في طاسة سخنة مع التقليب بالمعلقة لمدة ٥ - ١٠ دقايق و اضيف عليها معلقة سكر بني و معلقة قرفة بودرة (بندق ،عين جمل،لوز، صنوبر و اضيف،الزبيب في الاخر ) هو و جوز هند لو بتحبي طعمه) و طبعا مش لازم خالص كل انواع المكسرات ممكن نوع واحد بس مع القرفة و السكر هيبقي جميل.
شربات القطايف الحلوة:
علي النار ٢ كوب سكر ابيض و كوب و ربع مياه و عصير ليمونة هيغلي لحد ما يتقل ، تطفي النار و تحطي كيس فانيليا.
(القطايف تتحمر في زيت غزير سخن جدا و هي مجمدة).
وبالهنا والشفا